Andrés Álvarez é un compositor natural de Goián. No seu caso, o interese pola música xurdiu no fogar. «Comecei na banda de Goián, da que meu pai era presidente. Pouco a pouco fun probando cousas en composición, cada vez me gustaba máis e cando me decatei estaba metido de cheo», explica. Tan metido que conseguiu o recoñecemento internacional, como o que o levou a Hollywood coa peza Symphonic Sketches. Realizou os estudos de interpretación na especialidade de trompeta no Conservatorio Superior de Música de Vigo e a continuación a carreira de composición neste mesmo centro de estudos, baixo as ensinanzas de mestres como Juan Eiras, Carlos Cambeiro, Pablo Beltrán ou Fernando Buide entre outros. Especialízase en composición para banda e o medio audiovisual, con mestres como Ángel Montes, Bart Picqueur, Óscar Navarro ou Ferrer Ferrán. No campo audiovisual realizou traballos de publicidade para Adolfo Domínguez, Don Flamenco e Felicia Much. Tamén realizou diversas curtametraxes e documentais; a banda sonora da longametraxe Sueños de Sal, a banda sonora de La Muda, colaborando neles o recoñecido Óscar Navarro, ou na gravación da música orixinal da serie Seis Hermanas, con música orixinal de Sergio Moure, emitida por RTVE.