Os castros son os recintos que albergaban os poboados que se estenderon por todo o noroeste peninsular dentro da denominada cultura castrexa no último milenio antes de Cristo. Foron os romanos os que denominaron así a estas aldeas muradas. Un dos máis importantes de Galicia descubertos ata agora é o Castro do Monte Santa Trega situado na Guarda.

A Guarda localízase no sur de Pontevedra, xusto no extremo occidental de Galicia, onde o río Miño se mestura coas augas salgadas do océano Atlántico. A Guarda é unha vila de marcado carácter mariñeiro, industrial e turístico que conta cunha gran riqueza histórica e arqueolóxica. Aquí elévase o coñecido Monte Santa Trega, un baluarte estratéxico e inexpugnable de 341 metros de altura. Foi no cumio deste monte onde se situou un dos castros máis grandes do noroeste peninsular hai máis de 2000 anos que se sabe que se situaba no Ostium Mini, a Foz do Miño.

O poboado castrexo ocupa unha extensión de case 20 hectáreas, habéndose escavado un pequeno porcentaxe. Ademais do recinto murado, as vivendas repártense por diferentes partes do monte e mesmo na cima foron localizadas varias estruturas. Supónselle unhas medidas de 700 metros de norte a sur e de 300 metros de leste a oeste, converténdoo nunha das maiores citanias do noroeste peninsular e podendo ter albergado entre 3000 e 5000 persoas.